Әкесі өмірден өткеннен кейін Айару депрессияға түсіп, өзін жоғалтып алғандай.  Құмар ойынға қызығып, соның ізіне түскенін көргенде анасы мен ағасы қатаң шара қолданады. Ауылдағы әкесі негізін қалаған фермаға апарып тастайды.

Айару ауылдың тыныш атмосферасына үйреніп, ферманың жұмысын жандандыруға қызу кіріседі. Бұрын тұнжырап, тек өз әлемінде жүретін қыз жадырап сала береді. Бұлай болуына әсер еткен негізгі бір себеп – махаббат. Фермадағы жеке жүргізушісі Шыңғыс екеуінің арасындағы ұрыс-керістен басталған қарым-қатынас уақыт өте келе тәтті сезімге ұласады.

Шыңғыс ауылдағы қызы Нұршатпен сөз байласып, той күнін белгілеп қойған болатын. Ауқатты, ықпалды кісінің қызы Нұршат өз махаббатын біреуге оңай бере салатын адам емес. Шыңғыс қорқақтық танытып сезіміне сатқындық жасай ма, әлде елдің әңгімесін ысырып қойып, сүйіктісі Айарумен қосыла ма? Осылайша, Айару тыныштық табамын ба деп барған ауылда да шытырман оқиға тап болады. Бұл жердегі «ставканың» құны тым жоғары...